Universitetlərlə əməkdaşlığın genişləndirilməsi müzakirə edilmişdir.

Təhsil Tələbə Krediti Fondundan yararlanmış tələbələrin işlə təmin olunma imkanlarını yaxşılaşdırmaq istiqamətində Fond tərəfindən davamlı iş aparılır. Tələbə və məzunların peşəkar bacarıqlarını artırması üçün əmək bazarının tələblərinə uyğun təcrübə proqramlarına cəlb edilməsi, karyera yarmarkalarında iştirakının təmin edilməsi, onların müxtəlif sahələrdə öz bacarıqlarını sınamaq və inkişaf etdirməsi üçün şəraitin yaradılması məqsədilə dövlət və özəl sektorun aparıcı təmsilçiləri ilə əməkdaşlıq qurulur. Növbəti əməkdaşlıqlar Azərbaycan Texniki Universiteti və Azərbaycan Dövlət Pedaqoji Universiteti ilə quruldu. Bu əməkdaşlıq nəticəsində yüzlərlə tələbə müxtəlif dövlət və özəl qurumlarda təcrübə proqramlarına cəlb edilir.

Bu sahədə aparılan işlərin davamı olaraq, Azərbaycan Dövlət Pedaqoji Universiteti və Azərbaycan Texniki Universitetinin Karyera və Məşğulluq Mərkəzləri ilə görüşlər keçirilmişdir. Görüşlər zamanı bu universitetlərdə təhsil alan tələbələrin təhsilini başa vurduqdan sonra aldıqları təhsil kreditlərini geri qaytarmalarına dəstək göstərmək üçün onların məşğulluq imkanlarının artırılması məqsədilə təcrübə proqramlarına cəlb olunması, yekunda işlə təmin olunması və digər məsələlər ətrafında fikir mübadiləsi aparılmış, qarşıya qoyulan hədəflərə çatmaq üçün əməkdaşlığın genişləndirilməsi razılaşdırılmışdır.