Müraciətlərə dəstək üçün yardım masası fəaliyyətə başlayıb.

Ali təhsil müəssisələrinə bakalavriat səviyyəsi üzrə yeni qəbul olunanlar üçün qeydiyyat prosesinə start verilib. 2024-2025-ci tədris ili üçün 55656 nəfər universitetlərə qəbul olunub. Onlardan 28539 nəfəri ödənişli əsaslarla təhsil almaq hüququ əldə edib.  Ödənişli əsaslarla əyani təhsil alacaq tələbələr portal.edu.az-da qeydiyyat zamanı Təhsil Tələbə Krediti Fondunun www.e-ttkf.edu.az elektron portalına müraciət edərək təhsil haqqını kredit hesabına ödəyə və qeydiyyatlarını tamamlaya bilərlər.Təhsil tələbə kreditlərinə müraciət edən şəxslərə operativ dəstək göstərmək məqsədilə Təhsil Tələbə Krediti Fondunun Bakı şəhəri, Nəsimi rayonu, Səməd Vurğun küçəsi 34 ünvanında yerləşən ofisində yardım masası fəaliyyətə başlamışdır. TTK müraciəti zamanı çətinliklə üzləşən şəxslər hər iş günü saat 9:00-dan 18:00-a qədər qeyd olunan ünvana yaxınlaşaraq, Fondun əməkdaşlarının dəstəyindən yararlana bilərlər.